يوم ميلاد المصطفي صلي الله عليه وسلم

يوم ميلاد المصطفي صلي الله عليه وسلم





الميم .. مديحك هو زادي
ونور فؤادي يا مصطفي
والصاد .. صفاتك يا حبيبي
اتجسدت طهر وصفا
والطاء.. طريقك يا نبي
جنه ظلالها وارفه
والفاء .. في بحر محبتك
شفت الأمانه والوفا
والياء.. يا بخت اللى انوعد
في المروه يسعي والصفا


***

وكتبت قصه مولدك
يا مصطفي فوق الجبين
ولقيت حروفها منوره
بتنادي كل المؤمنين
صلوا على طه النبي
صلوا على الهادي الأمين
شمس الهدايه والأمل
خاتم لكل المرسلين
اللي الأله بعتو لنا
رحمه لكل العالمين


***

يا يوم ميلاد المصطفي
يا أحلي فرحه وأحلي عيد
فيك العناية أرسلت
للدينا هاديها الجديد
فيك الكريمة آمنه
وضعت لنا أطهر وليد
فيك النبوه اتكلمت
بالصدق والحق الأكيد
يا أحلي فرحه للبشر
أو للخلايق أحلي عيد


***

فى عام ميلاد المصطفي
هل بجيوشه أبرهه
والقائد المغرور علي
فيله بعظمه وأبهه
واتحركت كل الجيوش
ما لاقيه حد يردها
كان قصدها الكعبه عشان
ما تهدها على أهلها
كانت أهالي مكة تضرب
كفها
من عجزها على كفها


***

جد النبي واقف يقول
للكعبه يا ناس ربها
هو الإله وحده ورح
يحفظ ترابها وأرضها
نزلت طيوره م السما
عارفه هدفها وأمرها
حفرت لعسكر أبرهه
جوه الصحاري قبرها
يومها انكتب للإنسانيه
وللعقيده نصرها


***
في يوم ميلاد المصطفي
عرش الطاووس إنهز ليه
والقيصر الرومي شعر
بالرعشه تسري فى إيديه
والراهب اللي ف خلوته
من حكمته قال يومها إيه
هو اللى اسمه فى الوصايا
وفي الكتب منصوص عليه
أحمد وطه وأمين
والمصطفي بشراكو بيه


***
يا يوم ميلاد المصطفي
صحي الخلايق والجموع
خلي القلوب تمسك علي
إيمانها ما بين الضلوع
خليها تمشي عالطريق
الصح يملاها الخشوع
خليها تعرف عزها
في ذلها لله
وفي بحر الدموع
وارسم على طول الزمان
صوره تنور بالشموع


***
يا يوم ميلاد المصطفي
نور وإملا الدينا نور
خلي بساتين الأمل
فى قلبنا تطرح زهور
واملا سفاين عمرنا
بالحب فى كل الشهور
يا أحلي فى ذكري اتعطرت
بالنور على مر العصور
ذكري ميلاد المصطفي
ا فرحه فى دينانا تدور


***
فى يوم ميلاد المصطفي
صلوا على الهادي البشير
صلوا على اللى كلمته
حكمه ووحي من الضمير
اللي رفض تبقي جبال مكه
دهب وإن عاش فقير
واختار طريقة بالعمل
والصبر والقلب الكبير
يوم القيامة يا نبي
بيك الخلايق تستجير

بجد جميييييل تسلم ايدك جزاك الله خير جزاء